Aflaverðmæti nam rúmum 78 milljörðum króna á fyrri hluta árs 2021

Verðmæti afla við fyrstu sölu var rúmlega 78 milljarðar króna á tímabilinu janúar til júní 2021 sem er aukning um 10% miðað við fyrri hluta ársins 2020. Verðmæti loðnuaflans var rúmir átta milljarðar króna sem leiddi til þess að verðmæti uppsjávarafla var ríflega tvöfalt meira en á sama tíma fyrir ári og nam alls rúmum tólf milljörðum. Verðmæti botnfisktegunda á fyrstu sex mánuðum ársins var rúmir 60 milljarðar sem er 2% aukning miðað við sama tímabil í fyrra samkvæmt upplýsingum frá Hagstofu Íslands.